Facebook

စစ်ကောင်စီလက်နက်ကိုင်အဖွဲ့က မိုးကုတ်တွင် ညကင်းစောင့်သူများကို ပစ်သတ်

မိုးကုတ်မြို့၊လယ်ဦးရပ်ကွက်၊ တောင်နီဂွေ့အနီး ညကင်းစောင့်သူများကို စစ်တပ်က မတ် ၁၉၊ ည ၁၁ နာရီကျော်အချိန်တွင် သေနတ်အချက်၅၀ ကျော်ပစ်ခတ်ခဲ့ရာ၊ လူနှစ်ဦး သေနတ်ထိမှန်သေဆုံးခဲ့သည့်အပြင် နောက်ထပ်တစ်ဦးမှာလည်း စိုးရိမ်ဖွယ် သေနတ်ဒဏ်ရာ ရရှိထားကြောင်း သိရသည်။

ကျဆုံးသူရဲကောင်းနှင့် ဖမ်းဆီးခံရသူများအတွက်ရည်စူး၍ မိုးကောင်းကျောင်းတိုက်သံဃာတော်များ တရားဒေသနာရွတ်ဖတ်

မိုးကောင်းကျောင်းတိုက်သံဃာတော်များသည် မြန်မာ့နွေဦးတော်လှန်ရေးအတွင်း ကျဆုံးသွားသော အာဇာနည်သူရဲကောင်းများ၏ ကျေးဇူးတရားရဲစွမ်းသတ္တိတို့ကို အသိအမှတ်ပြုအောက်မေ့ခြင်းဖြင့်လည်းကောင်း၊ ဖမ်းဆီးခံရသော နိုင်ငံ့ခေါင်းဆောင်များနှင့် ပြည်သူများအားလုံ အမြန်ဆုံးလွတ်မြောက်စေရန် ရည်ရွယ်၍ မေတ္တသုတ်,မောရသုတ် ပရိတ်တော်များနှင့် မေတ္တာပို့များကိုရွှတ်ဖတ်ခြင်းကို ယနေ့ မတ် ၁၉ ညတွင် ဆောင်ရွက်ကြသည်။

ဓာတ်ပုံ-ဒါန

မြဝတီမြို့သပိတ် ကျည်အစစ်ဖြင့် ဖြိုခွင်းခံရ နှစ်ဦးဒဏ်ရာရရှိ

စစ်အာဏာရှင်စနစ်ကျဆုံးရေး မတ်၁၉ မြဝတီမြို့သပိတ်ကို စစ်ကောင်စီ၏ လက်နက်ကိုင်တပ်ဖွဲ့က ကျည်အစစ်ဖြင့် ပစ်ခတ်ဖြိုခွင်း၍ လူငယ်တစ်ဦး ပေါင်တွင် ဒဏ်ရာရရှိခဲ့သည်။

ယနေ့ မြဝတီမြို့၊ အမှတ်(၂)ရပ်ကွက် မြို့ပတ်လမ်းတွင် ပြုလုပ်သော အာဏာရှင်စစ်ကျင်ရေးသပိတ်ကို လူငယ် ၃၀ ဦးခန့် ပါဝင် ဆန္ဒပြပြီး လက်နက်ကိုင်တပ်ဖွဲ့အင်အား ၃၀ ကျော်က ရာဘာကျည်များ၊ ကျည်အစစ်များဖြင့် ပစ်ခတ်ဖြိုခွင်းခဲ့သည်။

အကြမ်းဖက်လက်နက်ကိုင်များ၏ နှိမ်နင်းမှုကြောင့် အသက် ၁၈နှစ် အရွယ်ခန့်ရှိ အမျိုးသားတစ်ဦး မျက်လုံးကို ရာဘာကျည် ထိမှန်ပြီး အသက် ၂၀နှစ် ကျော်အရွယ် အမျိုးသားတစ်ဦး ပေါင်တွင် ကျည်အစစ် ထိမှန် ဒဏ်ရာရရှိခဲ့သည်။

“အယောက် သုံးဆယ်လောက်နဲ့ စတင်တယ်။ ဘယ်လူကြီးမှလည်း မလာဘူး။ အနောက်ကနေ ထောက်ခံအော်မယ့်လူလည်းမရှိဘူး” ဟု သပိတ်တွင် ပါဝင်သည့် လူငယ်တစ်ဦးက ပြောသည်။

လက်နက်ကိုင်အင်အား ၃၀ကျော်ဖြင့် အရှေ့အနောက်ပိတ်၍ ဖမ်းဆီးရာ အမျိုးသမီးတစ်ဦး ဖမ်းဆီးခံရကြောင်း ဆန္ဒပြရာတွင် ပါဝင်သူ တစ်ဦးက ဆိုသည်။

ယနေ့ မြဝတီမြို့ သပိတ်ကို ဖြိုခွင်းရာတွင် ပြည်သူ ငါးဦး၊ သုံးဦး စသဖြင့် ဖမ်းဆီးခံရကြောင်း မြို့အတွင်း သတင်းများ ထွက်ပေါ်သော်လည်း အတည်မပြုနိုင်သေးကြောင်း သပိတ်တွင် ပါဝင်သူ အမျိုးသားတစ်ဦးက ပြောသည်။